Naxçıvan Muxtar Respublikasının Fövqəladə Hallar Nazirliyi tərəfindən İqtisadiyyat Nazirliyinin yanında Antiinhisar və İstehlak Bazarına Nəzarət Dövlət Xidmətində hərbiləşdirilməmiş mülki müdafiə qüvvələri ilə “Fövqəladə hadisələrin nəticələrinin aradan qaldırılması zamanı mülki müdafiə dəstələrinin idarə edilməsinin təşkili” mövzusunda xəbərdarlıq toplanışı üzrə nümunəvi obyekt mülki müdafiə məşqi keçirilib.
Məşqin keçirilməsində məqsəd mülki müdafiə tədbirlər planının reallığının yoxlanılması, məşqə cəlb edilən heyətlərin mülki müdafiə sahəsində biliyinin artırılması və bu sahədə əməli vərdişlərin aşılanması olub.
Tədbirdə Antiinhisar və İstehlak Bazarına Nəzarət Dövlət Xidmətinin Fövqəladə Hallar Komissiyasının üzvləri, mülki müdafiə qüvvələrinin şəxsi heyəti, Fövqəladə Hallar Nazirliyinin Mülki müdafiə işinin təşkili şöbəsinin, Mülki müdafiə alayının, Xüsusi Riskli Xilasetmə Xidmətinin və Naxçıvan şəhər Dövlət Yanğından Mühafizə Hissəsinin əməkdaşları iştirak ediblər.
Məşq zamanı heyətlərin fövqəladə hal barədə xəbərdar edilməsi, toplanması, habelə yaranmış ekstremal vəziyyətin nəticələrinin aradan qaldırılması və ümumi idarəetmənin təşkili üzrə fəaliyyətləri qiymətləndirilib, həmçinin funksional vəzifələrlə bağlı məruzələr dinlənilib.
Uğurla həyata keçirilən məşqdən sonra əldə edilən nəticələr müzakirə olunub, aidiyyəti üzrə tapşırıqlar verilib.
