Xocalı soyqırımının ildönümünə həsr olunan tədbir soyqırımı qurbanlarının, eləcə də Vətənimizin ərazi bütövlüyü uğrunda canlarından keçən şəhidlərimizin əziz xatirəsinin bir dəqiqəlik sükutla yad edilməsi ilə başlayıb.

 Tədbirdə çıxış edən Naxçıvan Muxtar Respublikasının Fövqəladə Hallar Nazirliyin Böhran Vəziyyətlərində İdarəetmə İdarəsinin rəisi polkovnik-leytenant Nurlan Həsənov Xocalı soyqırımının XX əsrin ən böyük faciələrindən biri olduğunu qeyd edib. Törədilən soyqırımı aktının erməni millətçilərinin azərbaycanlılara qarşı həyata keçirdiyi terror və kütləvi qırğın siyasətinin tərkib hissəsi olduğunu vurğulayaraq bu faciənin təkcə Azərbaycan xalqına deyil, bütün insanlığa qarşı yönələn ən ağır cinayət olduğunu diqqətə çatdırıb.

 Nurlan Həsənov Xocalı faciəsinə ilk dəfə hüquqi-siyasi qiymətin Ulu Öndər Heydər Əliyev tərəfindən verildiyini vurğulayıb.

 Tədbirdə Katiblik və ictimaiyyətlə əlaqə şöbəsinin rəisi kapitan Zülfüqar Zülfüqarov, Sənədlərlə və vətəndaşların müraciətləri ilə iş şöbəsinin rəisi Ülvi Əliyev dövlətimiz tərəfindən Xocalı soyqırımını törədənlərin ifşa olunması və beynəlxalq ictimaiyyətin geniş məlumatlandırılması, beynəlxalq aləmdə yayılması, bu soyqırımına obyektiv qiymət verilməsi məqsədilə davamlı addımların atıldığını qeyd ediblər.

 Tədbirin sonunda Xocalı soyqırımına həsr olunan videoçarx nümayiş olunub.